संपादकीय-२०२३

चित्रपटाच्या कथानकात प्रेमाचे अनेक पैलू समोर येतात. प्रेमाचे त्रिकोण चौकोनामधील अशाच एका आगळ्यावेगळ्या प्रेमाच्या पैलूबद्दल लिहित आहेत प्रसिद्ध लेखिका डॉ. वंदना बोकील- कुलकर्णी. आपल्या आवडत्या चित्रपटांमधील प्रेमाचे हळुवार पैलू त्यांनी त्यांच्या लेखणीतून खूप सुरेख उलगडले आहेत.

कथानकात फक्त मानवी पात्रं नसतात, तर ज्या ठिकाणी कथानक घडतं ती ठिकाणं देखील कथानकातली अविभाज्य पात्रं बनतात. नदी हे असंच एक प्रभावी पात्र! प्रसिद्ध लेखक आणि पत्रकार प्रणव पाटील यांनी अशा नद्यांच्या कडेकडेनं चालणाऱ्या कथानकांचा प्रवास आणि त्यांचे पैलू आपल्या लेखातून अत्यंत ओघवत्या शैलीत सचित्र मांडले आहेत.

तुम्हाला हा आगळावेगळा लेख वाचायला नक्कीच आवडेल. याचप्रमाणे चित्रपट तयार होताना शेवटचा टप्पा असतो तो म्हणजे पोस्ट-प्रोडक्शन, ज्याबद्दल सामान्य प्रेक्षकांसाठी विशेष माहितीपर लेख लिहिला आहे प्रसिद्ध पोस्ट-प्रोड्युसर प्रशेन क्यावल यांनी.

दिवाळी अंक म्हंटलं की सगळं खुसखुशीत हवं आणि अशाच एका खुसखुशीत एव्हरग्रीन ‘गोलमाल’ सिनेमाबद्दल लिहिलं आहे अतुल तळाशीकर यांनी. हा लेख वाचून खूप जणांना परत एकदा गोलमाल बघण्याची इच्छा होणार हे नक्की!

डॉ. माधुरी जोशी हे शास्त्रीय संगीत क्षेत्रातील एक सुपरिचित नाव. गाणं आणि त्याचं सादरीकरण यांनी त्यांचं जीवन अतिशय समृद्ध केलं. आवाजाची दैवी देणगी, जितेंद्र अभिषेकीबुवांसारखे उत्तम गुरु, आणि पद्मश्री पं. रोहिणीताई भाटे यांच्यासह गायनसाथ करण्याचा तब्बल पंचवीस वर्षांचा प्रवास! अशा समृद्ध गायिकेने पं. बिंदादीन महाराजांच्या संगीत रचनांवर विस्तृतपणे लिहिलेल्या सुंदर पुस्तकातील काही भाग वाचकांसाठी ‘चित्रवेध’ मधून सादर करत आहोत.

गेली चार-पाच वर्षं मी दिवाळी अंकांसाठी लेखन इ. करताना चित्रवेधच्या टीमचाही भाग होते. चित्रवेधसाठी लिहिताना आणि टीमसोबत संवाद साधताना मला या अंकाचं आणि अंकाशी जोडल्या गेलेल्या लोकांचं वेगळेपण जाणवत होतं. सिनेमाबद्दलचा प्रचंड विचार करणारी, त्यात झोकून काम करणारी, त्याकडे तटस्थ प्रेक्षक म्हणून पाहणारी, सिनेमावर प्रेम करणारी आणि सिनेमाच्या विविध अंगांमध्ये तज्ञ असलेल्या अनेक कलावंतांना मला या टीमचा एक भाग म्हणून जवळून पाहता आलं, जाणून घेता आलं. काहीशा वेगळ्या क्षेत्रातून आलेल्या पण सिनेमा आणि स्टोरी टेलिंग यावर मनापासून प्रेम असलेल्या माझ्यासाठी हा अनुभव खूपच खास होता, नेहमीच असेल. यंदाच्या दिवाळी अंकाचं प्लॅनिंग करताना एकूणच सर्वांनी एकत्र येऊन काहीतरी सर्जनशील करण्याची ही प्रक्रिया संपादक म्हणून मी खूप एन्जॉय केली. वाचकांना अंकाच्या माध्यमातून काय नवीन सांगावं याबद्दल बोलताना, भेटीगाठी घेताना, लेखकांशी संवाद साधताना माझी छोटीशी ओंजळ नव्याने भरत गेली… मला चित्रपट रसिक म्हणून अधिक समृद्ध करणारा हा अजून एक अनुभव दिल्याबद्दल चित्रवेधच्या फाउंडर सुचेता फुले यांचे मनःपूर्वक आभार.

चित्रवेध नेहमीच आपल्या डिजिटल दिवाळी अंकातून उत्तमोत्तम गोष्टी तुमच्यासमोर आणत आला आहे… आपणां सर्वांची दिवाळी या अंकासह आनंदमय आणि मनोरंजनपूर्ण साजरी होवो या मनःपूर्वक शुभेच्छा!